गुरुपादुकाष्टक निरूपण प्रारंभ प्रस्तावना

गुरुपुष्यामृत गुरुवार निमित्त आजपासून गुरु पादुका अष्टक या दहा श्लोकी गुरुस्तुती वरती निरूपण प्रस्तुत करत आहे. केवळ तात्त्विक आध्यात्मिक तत्त्वज्ञानात्मक अशी मांडणी न करता, व्यावहारिक लौकिक रोजच्या जीवनात नित्य उपयोगी, अशा प्रकारे गुरुपादुकाष्टक या रचनेची निरूपणात्मक प्रस्तुती सादर करीत आहे. निरूपण सुरू करण्यापूर्वी गुरुपादुकाष्टक काय आहे त्या दहा ओव्या येथे देत आहे आजचे निरूपण स्पष्टीकरण वाचण्यापूर्वी, एकदा गुरुपादुकाष्टक रचनेतील सर्व श्लोक म्हणूया ऐकूया ... मोठ्याने गजर करत, त्याचं भजन करून!! खूप सुंदर प्रासादिक शब्द आहेत , खूप समाधान मिळणारी हृदयंगम अनुभूती आहे ... श्रीगुरुपादुकाष्टक ज्या संगतीनेंच विराग झाला । मनोदरींचा जडभास गेला । साक्षात् परात्मा मज भेटविला । विसरुं कसा मी गुरुपादुकांला ॥ १ ॥ सद्योगपंथें घरि आणियेलें । अंगेच मातें परब्रह्म केलें । प्रचंड तो बोधरवि उदेला । विसरुं कसा मी गुरुपादुकांला ॥ २ ॥ चराचरीं व्यापकता जयाची । अखंड भेटी मजला तयाची । परं पदीं संगम पूर्ण झाला । विसरुं कसा मी गुरुपादुकांला ॥ ३ ॥ जो सर्वदा गुप्त जनांत वागे । प्रसंन्न भक्ता निजबोध सांगे । सद्भक्तिभावांकरितां भुकेला । विसरुं कसा मी गुरुपादुकांला ॥ ४ ॥ अनंत माझे अपराध कोटी । नाणी मनीं घालुनि सर्व पोटीं । प्रबोध करितां श्रम फार झाला । विसरुं कसा मी गुरुपादुकांला ॥ ५ ॥ कांहीं मला सेवनही न झालें । तथापि तेणें मज उद्धरीलें । आता तरी अर्पिन प्राण त्याला । विसरुं कसा मी गुरुपादुकांला ॥ ६ ॥ माझा अहंभाव वसे शरीरीं । तथापि तो सद्गुरु अंगिकारीं । नाहीं मनीं अल्प विकार ज्याला । विसरुं कसा मी गुरुपादुकांला ॥ ७ ॥ आतां कसा हा उपकार फेडूं । हा देह ओवाळुनि दूर सांडूं । म्यां एकभावें प्रणिपात केला । विसरुं कसा मी गुरुपादुकांला ॥ ८ ॥ जया वानितां वानितां वेदवाणी । म्हणे ' नेति नेतीति ' लाजे दुरुनी । नव्हे अंत ना पार ज्याच्या रुपाला । विसरुं कसा मी गुरुपादुकांला ॥ ९ ॥ जो साधुचा अंकित जीव झाला । त्याचा असे भार निरंजनाला । नारायणाचा भ्रम दूर केला । विसरुं कसा मी गुरुपादुकांला ॥ १० ॥ ॥ इति गुरुपादुकाष्टक संपूर्ण ॥